ᒪᑐᐃᖅᑕᐅᓂᖓᓄᑦ ᑲᑎᓐᓂᖅ: ᐄᑉᐳᓘ 13, 2019, 2-ᐅᓐᓄᓴᒃᑯᑦ
ᐋᕐᓗᕐᑐᖅ ᐊᐃᐱᓕ (1951−ᒥ 2007−ᒧᑦ) ᐃᓅᓕᖅᑐᒥᓂᖅ ᓄᕗᖅᑯᖅᒥ ᕿᑭᖅᑖᓗᒻᒥ ᐱᕈᖅᓴᓂᑰᑦᓱᓂ ᐃᖃᓗᓐᓂ ᓄᑦᑎᖏᓐᓂᕐᒥᓂ ᐋᑐᕚᒧᑦ ᐃᓅᓱᒃᓱᓂ. ᐃᖅᑲᓇᐃᔭᖃᑦᑕᓕᖅᓱᓂ ᑐᑭᓕᐅᕆᓂᕐᒥᒃ, ᑎᑎᖅᑐᒐᕐᓂᕐᒥᒃ ᐊᒻᒪ ᐅᓂᒃᑳᖅᑎᐅᓂᕐᒥᒃ ᐅᖁᓄᖓ ᐃᓄᐃᑦ ᑕᖅᑭᑕᒫᑦ (ᑕᐃᔭᐅᕙᓕᖅᑐᒥᓂᕐᒥᒃ ᐃᓄᐃᑦ ᐅᓪᓗᒥ) 1970−ᕈᕋᑖᓂ, ᑭᖑᓂᒐᒍᑦ ᐊᐅᓚᑦᓯᔨᒋᔭᐅᓕᖅᑐᒥᓂᖅ ᑖᒃᑯᓄᖓ ᐅᖃᓕᒫᒐᓕᐊᖑᕙᑦᑐᓄᑦ. ᐊᒥᓱᑎᒍᑦ ᐅᖃᓕᒫᖅᑕᐅᕙᓐᓂᖏᑎᒍᑦ ᐅᖃᓗᕋᐅᔭᓕᐊᖏᑕ, ᑎᑎᕋᖅᓯᒪᔭᖏᑕ ᐊᒻᒪ ᐸᐃᑉᐹᒧᑦ ᑎᑎᕋᖅᓯᒪᔭᖏᑕ ᒥᒃᓵᓄᑦ, ᐊᐃᐱᓕ ᓂᐱᖃᖅᑎᑦᓯᓯᒪᔪᖅ ᐱᒻᒪᕆᐅᔪᒥᒃ ᐃᓕᖅᑯᓯᕐᒨᖓᔪᓂᒃ, ᒐᕙᒪᓕᕆᓂᕐᒨᖓᔪᓂᒃ ᐊᒻᒪ ᐃᓄᐃᑦ ᐃᓅᓯᖏᑕ ᒥᒃᓵᓄᑦ ᐊᒃᑐᐊᔪᓂᑦ ᐃᓄᐃᑦ ᓄᓇᖓᓄᑦ, ᒥᑕᔭᓐᓂᕐᒥᒍᑦ ᐊᒻᒪ ᕿᓄᐃᓵᒃᑲᐅᓂᕐᒥᒍᑦ.
ᐊᐃᐱᓕ ᑕᐸᐃᕐᓇᖅᓱᓂ ᑎᑎᖅᑐᒐᖅᑎᒥᓂᖅ, ᐊᒥᓱᐊᓗᓐᓂᒃ ᒐᕙᒪᓕᕆᓂᕐᒧᑦ ᑐᕌᖓᔪᓂᒃ ᑎᑎᖅᑐᒐᖃᑕᖅᓯᒪᔪᖅ, ᑎᑎᖅᑐᒐᖃᑦᑕᖅᓱᓂᓗ ᐃᔪᕐᓇᖅᑐᓂᒃ ᐅᑯᐊ ᐃᓚᒋᔭᐅᑦᑎᒃ “ᓂᓚᒃ ᑭᑉᐹᕆᑦᑐᖅ” ᐊᒻᒪ “ᓄᓇ” ᐊᒻᒪ “ᕗᑦ” ᐊᖏᓂᖅᓴᓂᓪᓗ ᑎᑎᖅᑐᒐᖃᑦᑕᓕᓂᐅᓪᓗᓂ, ᑕᒪᒃᑯᐊ ᐅᖃᓕᒫᕋᕈᖅᑎᑕᐅᓂᑰᓪᓗᑎᒃ ᐅᖃᓕᒫᒐᓕᐊᒥᓂᖓᓂ ᐅᑭᐅᖅᑕᖅᑐᒥ ᓯᓐᓇᒃᑑᒪᐃᑦ ᓯᓐᓇᒃᑑᒪᑲᒻᒪᐃᓪᓗ (1993) ᑕᒪᒃᑯᐊ ᖃᐅᔨᒪᔭᐅᑦᓯᐊᖅᑐᑦ. ᑕᒪᓐᓇ ᓯᕗᓪᓕᖅ ᐋᕐᓗᕐᑐ ᐊᐃᐱᓕᐅᑉ ᑎᑎᖅᑐᒐᖃᑦᑕᕐᓂᒥᓂᖓ ᐊᒥᓱᓂᒃ ᐃᖅᑲᓇᐃᔮᕆᖃᑦᑕᖅᓯᒪᔭᖏᓐᓂᒃ, ᑕᑯᑦᓴᐅᑎᑦᓯᔪᑦ ᐱᒻᕆᐅᓂᖓᓂᒃ ᐊᒻᒪ ᑲᔪᓯᓂᖓᓂᒃ ᓂᐱᒥᒍᑦ ᑕᑯᓐᓇᖑᐊᖅᑕᒥᒍᓪᓗ.
ᑲᒪᒋᔭᐅᔪᖅ ᓴᓐᑐᕋ ᑕᐃᒃ, ᕼᐃᑐ ᐃᒃᓗᓕᐅᕐᑎ ᐊᒻᒪᓗ ᑯᕆᓯᑎᓐ ᓚᓛᓐᑦ ᐃᓕᓐᓂᐊᕐᕕᒃᔪᐊᖅ ᑳᕈᑕᓐ ᓴᓇᐅᒐᓕᕆᓂᕐᒧᑦ ᑕᑯᔭᒐᖃᕐᕕᒃ. ᐋᑐᕚ, ᐋᓐᑎᐅᕆᐅ